یاشیل احساسلی - حمیده رئیس زاده ، سحر خانیم

یاشیل احساسلی

 

گئنه نیسگیل لئچگین سالدی خزان

اچمامیش غنچه لری چالدی خزان

منی ده جایناغینا آلدی خزان

یاشیل احساسلی چمن ساخلا منه

..

یالانا دوزلوک اوخو ائتسه اثر

گول بیتیب ، غنچه گولوب ، آچسا سحر

بیرده گؤرکملی اوره ک گؤرسن اگر

او اوره کلرده وطن ساخلا منه

..

سؤزلرین سینه لره کؤز قالادار

دویغونون توشگولو کؤزدن جالادار

اونداکی سؤز گونشی چالخالادار

سؤزده اولدوز کیمی دن ساخلا منه

.

دایاغ عونوانلی داغ آواره سی یم

قارا گونلرده آغ آواره سی یم

بیر گولوشلوک دوداغ آواره سی یم

غملره قارشی گولن ساخلا منه

..

دئمیرم خوشلوغا یاد ائت یادا سال

غم اؤنونده آدیمی فریادا سال

منی ده غم بؤلوشنده آدا سال

بیر اوره ک پایلی محن ساخلا منه

..

بیر دایان ، ذیروه یه دیزقوی گلیرم

سانماکی خسته یم ، ایز قوی گلیرم

بیر چاناق سؤزده دئنیز قوی گلیرم

بیر دؤیوش مئیدانی چن ساخلا منه

..

اوجالیقلاردا ایزین وار دئیه رک

چیخارام داغلارا یار – یار دئیه ره ک

گله رم غربت ائوین دار دئیه ره ک

وطن عونوانلی کفن ساخلا منه

 

حمیده رئیس زاده - سحر خانیم

دنیزدن دنیزه - حمیده رئیس زاده

دنیزدن دنیزه

 

ایستیرم سئودانی قانیما قاتام

ایستیرم واریمی یوخوما قاتام

دار پالتاردیر ایینیم ، جانیم سیخیر

ایستیرم اینیمی چیخاردام آتام

آی سئوگی یاییندان یاییلان اوخلار

آییقلیق سئویرم قویمایین یاتام

سیغماییر باغریما یاغیرتیلاریم

هاچاناجاق گره ک باغیرتی اوتام

ساحیلی ساخلایین عاغیللی لارا

من گئدیم دنیزدن دنیزه باتام

 

مقاله ی ترکی / " سحر" ين " ماويلر"ي / حمیده رئیس زاده نین شعر لری حاققیندا / علیرضا ذیحق

View Raw Image" href="http://s3.tinypic.com/fxr0qv.jpg" class="thickbox">

 

عليرضا ذيحق

 

 

" سحر" ين " ماويلر"ي

 

ادبي تنقيد

 

" ح.ر . سحر " ين  " ماويلر" آدلي شعر مجموعه سي نين 65- نجي ايلده ياييلما خبري ، اولدوز كيمي نه قَدَر سس سيز آخسادا او قَدَر آرتيق پارلادي و آذربايجان ادبيات سماسيندا يئني بير آيدين ليق و جانلانما يا چئوريلدي.

فيكيرده و دويغو دا تام بير دَييشيك ليك ، باجاريقلي تكنيك و فورم ، گؤزل ، جانلي و الوان تصوير لر ، اونون صنعت و ياراديجيلقي نين گؤزه چارپان ايلك خصوصيت لريندن اولاراق ، بيز بوشعر لرين آرديندا دوشونجه لي ، آييق ، درين ايلهام لي و اينجه دويغولو بير قادين شخصيتي ايله ده تانيش اولوروق.  بو قادين ليغين سرين و گئنيش كؤلگه سي ، تكجه اونون جسارتلي ليريكا سيندا يوخ ، بلكه باشقا جهت لي شعر لرينده ايسه اؤز اُبرازيني يئر به يئر تمثيل ، تشبيه و استعاره شكلينده بيلديرير.

" ماوي گؤيلر چارشابلارين آچان زامان " ، " دريالار اوسكويه دولمايان كيمي " ، " آغزيمدا كي ساققيز سئوينجيم " ، " قان رنگين گؤستر مز دونومو گئييم " ،" قاشي دوشموش اوزو گومو " و داها آيري ميصراعلاردا گلن بئله نكي تشبيه لر ، تكجه قادين احساساتيندان  چاغلانا بيله ن ادبي بديعي تصوير لر اولا بيله رلر . ايجتيماعي موناسيبت لره ياناشماق ، دؤورون موعاصير طلب  و چتين ليك لرينه توخونماق و آچيق گيزلين درد لري دويوب قانماق ، بيليك و آييق ليق دان آسيلي اولماق لا برابر ،او نيسگيل و درد لري ادبي – بديعي بير شكيلده جسارتله يازيب بيان ائتمك ، صنعتكارين داها آرتيق بير وظيفه سينه چئوريلمه ليدي و " سحر " ين پوئز ياسي  حتتا او آنلاردا كي شاعير ، حياتي نين لاپ خصوصي و محرمانه جهت لريندن سؤز آچير بو آغير و چتين ايجتيماعي وظيفه يه صاديق قالاراق ، اومود وئريجي بير واقيف ليك له اوخوجو ايله يانا شير :

 

سارسيلماز داغلارين ذيروه سين دئديم ،

ديزلريم يورولوب بوكولن زامان .

لحظه لر اوستونه

گئجه لر بويو

ظولمت قارقيش كيمي تؤكولن زامان:

صاباحين، گونشين جلوه سين دئديم.

سئوگينين گؤروشه گلمه سين گرك

هاچاناجان دئمك؟

هاچانا قدر؟

بو آييق سالماق ليق و خلقين مينلرجه آدسيز ، سوسموش و گيزلي كدر و غم لريندن حزين – حزين سؤز آچماق نهايتده اوجا بير فرياده دؤنور:

سارلدي غصه دن اوزلر ، آغاردي يول دؤين گؤزلر

نه لازيمدير حزين سؤزلر ، " سحر " فرياد اولان يئرده

بو اَل ده ائديلميش واقيف ليك دير كي آزاد ائديجي ديناميزم لره جان و گوج وئرير و " كؤرپه اَللرين بارماقلاريندا ، قان قوروياندا " و اونداكي " ماويلرقارالير دان اوزاقلاشير" " آد آرزوسون سينه سيندن كؤهنه نيشان كيمين درن ، عشقي قبله ائده ن ايگيت ، گونش يولون گئده ن ايگيت " لر بسله نير لر .صنعتكارين موعاصير ليگي و دؤوره اويغون اولان بير ديلي مهارتله بديعي ياراديجيليقيندا  ايشه آپارديقي ، اونون ليريكاسينا داها دَيَر لي بير گؤزه ل ليك و يئني ليك وئرير.

... پولاد تك اراده ،

بير شوشه گولاب كيمي ساده انسان

ديله ييرم .

پاساژ قاباغيندان ، پاساژ قاباغينا چاتماق،

ساوالان دايانا جاقلي ياشا ماق،

 چتين يولا يولداش ديله ييرم.

چتين يولا

يولداش ...

 

" زامان يو كو كوره گيمده " دئييب " صاباحين يولو هارداندي ؟ " سوران شاعيرين " پاساژ " كيمي بئله نكي اُبراز لاري ايشه آپارماقي ، هئچ ده تصا دفي دئييل بلكه بونلار بوتونلوك له ، موعاصير طلب لري دويوب قانماق دان ايره لي گلن  بير آغير ضرورتين  نيشاني كيمي قييمت لن مه لي دير لر . ايجتيماعي سمبو ليزمين تأثير گوجو و آرادا سيرا دا گؤرونن سوررئاليزمين ايري و قانلي دامار لاري ، ماويلر مجموعه سيني داها زنگين له دير .  نئجه دييه ر لر شاعيرين ياراديجيليق دونياسيندا اَن سيرلي ، تعجبلي و دهشتلي اولان ايشلر و اتفاق لار ، ائله بير عادي و حقيقي ساياقدا جيلوه له نير لر كي بو آرادا تكجه شاعير ايلهامي و ايلهاما باغلي ليق دير كي او اَل چاتماز و سِحيرلي دونيا لارين " زامان توزونا " بورونموش قاپي لارين بيزيم اوزوموزه آچيري :

گئجه دير...

باخيرام آي باجاسيندان

باشقا بير ماوي گؤيه

اوردا دا وار ائله بيل :

گئجه يوردو ن قانا دؤنموش دنيزيندن

نئچه بير غملي بولود ،

چنلي داغ ،

قانلي سؤيود .

گئجه دير ...

باخيرام آي باجا سيندان

باشقا بير ماوي گؤيه

سربست  شعر لرده ريتميك بير وزن و كلامين موسيقيايي ظرفيت لريندن باجارديقجا بهره لن مك ، تكنيك و فورما جهتيندن " سحر " ين شعريني داها اوستون بير سويه يه قالديرير:

ياخينلاشير

 ياواش ياواش

يانار داغا ياناشماقيم ،

ياناشماغين ،

ياناشماقلار .

" سارالان گولو ، بيچيلن ديلي " و " قفس آدلي لانه ني نئيليرم " سؤيله ين شاعير " يئني غربته قووشوم گئديم " دئسه ده غربت پنجه سينده ده وارليقين بوغولان گؤرور . آخي شاعير دئميشكن گئجه دير و بو گئجه ده " شيرينلر آجي دير ، هرنه وار غريب / لحظه لر لاپ اوزون / ديلك لر سورگون / اولدوزلار اوزونه چئويريب بؤركون ..." آمما نه غم كي ظلمت دن زارا گلن و اوره گيني كدر اوزه ن شاعير  صاباحا اينانيري ، اؤزوده بؤيوك بير ايناملا :

تك قاليب ظلمت اَلينده ، باغيريب سوسما " سحر"

چكيلر جهد ائله سك آيري مداره گئجه لر

 

 

15/5/67- تهران

 

--------------------------------------------------

·        ماويلر / حميده رئيس زاده ( ح.ر. سحر ) / بيرينجي چاپ 1365/ انتشارات فرزانه / تيراژ 500نوسخه

 

 

 

 

   دانلود:

 

 اینجا را کلیک کنید  Click here to download this file

 

عليرضا ذيحق - حميده رئيس زاده ( سحر) و شعر لرينه باخيش

آغلاماق هاواسی - حمیده رئیس زاده

آغلاماق هاواسی - حمیده رئیس زاده

یارین یاری گلیر دئیه
داغدا شلاله لر گولور
یار دوداغی گولور دئیه
باغداکی لاله لر گولور
یار یاریلان گولور دئیه
الده پیاله لر گولور
یار گولورکن
اوزلر گولور
گؤزلر گولور
دوداقلاردا سؤزلر گولور
هانسی لاله آیاقلانیب ؟
آغلاماق هاواسی گلیر

بیگانه بیگانه - حمیده رئیس زاده

بیگانه بیگانه - حمیده رئیس زاده

گلیبسن اوز اوزه باخما منه بیگانه - بیگانه

اؤتورمه ایریلیق یوردون گزیم دیوانه - دیوانه

دولاندیر بیر باخیش رطلین منیم احوالیمه گاهدان

گؤزوندن قوی ایچیم گیزلین چاخیر پیمانه - پیمانه

نظر سال قات - قات آیریلسین جانیمدان غربت آثاری

آچیلسین شعریمین یارپاقلاری میخانه - میخانه

سینیخ سالخاخ اوره کلردن ایزین گؤرسه تدیلر خلقه

قالیب کؤنلوم جلالیندانایراق ویرانه - ویرانه

منیم شوقومدور عالمده ، جنون رنگینده پایلاندی

گؤرور هر یئرده بیر شعله ، یانیر پروانه - پروانه

منم مجنون ، منم لیلا ، منم وامق ، منم عذرا

منیم دردیم دوشوبدور دللره ، افسانه - افسانه

سحر ال چک یاخامدان ، حایل اولما منظر وصله

چکیل گئت بیر گؤروشه جان وئریم جانانه - جانانه